भारत चीनला धक्का देण्याच्या तयारीत
नवी दिल्ली : वृत्तसंस्था
अमेरिका आणि चीन यांच्यातील टॅरिफ वॉर नुकतेच शांत झाले आहे. अमेरिकेने चीनवर २४५ टक्के तर चीनने अमेरिकेवर १२५ टक्के टॅरिफ आकारण्याची घोषणा केली. त्यानंतर चीनने अमेरिकेसोबत काही अटींवर चर्चेची तयारी दर्शवली होती. आता भारताकडून येत्या काही दिवसांमध्ये चीनला धक्का दिला जाऊ शकतो. भारतात विदेशातून येणा-या स्टीलवर आयात शुल्क लादले गेल्याने ते महाग पडू शकते. चीनमधून आयात केल्या जाणा-या स्टीलवर १२ टक्के आयात शुल्क टेम्पररी टॅरिफ सेफगार्ड ड्युटी लावली जाऊ शकते.
चीन किंवा जगातील इतर देशांतून कमी किमतीवर स्टील आयात वाढू नये, म्हणून १२ टक्के टॅरिफ लादले जाऊ शकते. कारण भारत जगातील कच्च्या स्टीलची निर्मिती करणारा दुस-या क्रमांकाचा देश आहे. आर्थिक वर्ष २०२४-२५ या आर्थिक वर्षात आणि त्यापूर्वीच्या आर्थिक वर्षात स्टीलच्या निर्यातीपेक्षा आयात अधिक झाली आहे. सरकारच्या प्रोव्हिजनल डेटानुसार स्टीलची आयात ९५ लाख मेट्रिक टनपर्यंत पोहोचली आहे. केंद्रीय व्यापार मंत्रालयाच्या अंतर्गत येणा-या डायरेक्टोरेट जनरल ऑफ ट्रेड प्रॅक्टिसेसने स्वस्त आयातीला रोखण्याच्या प्रयत्नांचा भाग म्हणून १२ टक्के टॅरिफ लादण्याची शिफारस केली होती.
ही शिफारस २०० दिवसांसाठी लागू करण्यासंदर्भात होती. गेल्या वर्षी डिसेंबरमध्ये करण्यात आलेल्या चौकशीनंतर हे समोर आले होते की स्वस्त आणि निर्बंधाशिवाय होत असलेल्या आयातीने देशांतर्गत स्टील उद्योगाला नुकसान सहन करावे लागले होते. सूत्रांच्या माहितीनुसार आता १२ टक्के आयात शुल्क लादले जाऊ शकते.
