मुंबई : प्रतिनिधी
मुंबई आंतरराष्ट्रीय विमानतळ आणि ताज हॉटेलला बॉम्बने उडवण्याची धमकी मिळाली आहे. ही धमकी मुंबई विमानतळ पोलिसांच्या ई-मेल आयडीवर पाठवण्यात आली, ज्यामध्ये मुंबईच्या छत्रपती शिवाजी महाराज आंतरराष्ट्रीय विमानतळाला पुन्हा एकदा बॉम्बने उडवण्याची धमकी देण्यात आली. मुंबई विमानतळ आणि ताजमहाल पॅलेसला बॉम्बने उडवण्याच्या धमकीच्या ई-मेलमुळे खळबळ उडाली आहे.
या धमकीनंतर पोलिस आणि सुरक्षा यंत्रणा सतर्क झाल्या असून तपास सुरू झाला आहे. हा धमकीचा ई-मेलमध्ये दहशतवादी अफजल गुरु आणि सैवक्कू शंकर यांना ‘अन्यायाने फाशी दिल्याचा’ उल्लेख करत पाठवला आहे. मुंबई पोलिस ई-मेल पाठवणा-याचा शोध घेत आहेत. धमकीचा ईमेल मिळाल्यानंतर सुरक्षा यंत्रणा सतर्क झाल्या असून संपूर्ण मुंबईत लष्करी दल तैनात करण्यात आले आहे.
दरम्यान, मुंबईच्या छत्रपती शिवाजी महाराज आंतरराष्ट्रीय विमानतळ आणि ताज हॉटेलवर डॉग स्क्वॉडच्या पथकाने प्रत्येक कोप-याची तपासणी केली आहे. मुंबई पोलिस ईमेल पाठवणा-याचा शोध घेण्यासाठी कार्यरत झाले आहेत. यापूर्वीही छत्रपती शिवाजी महाराज आंतरराष्ट्रीय विमानतळाला बॉम्बने उडवण्याची धमकी मिळाली होती. जम्मू-काश्मीरमधील पहलगाम येथे दहशतवादी हल्ल्यानंतर सुरक्षेसंदर्भात विशेष खबरदारी घेतली जात आहे.
