मुंबई : प्रतिनिधी
गेल्या दोन दिवसांपासून मिठी नदी घोटाळा प्रकरणाची चौकशी सुरु आहे. यासाठी अभिनेता डिनो मोरियाची आणि त्याचा भाऊ सँटिनो मोरियाचीही आर्थिक गुन्हे शाखेकडून चौकशी करण्यात येत आहे. आज पुन्हा एकदा तिसऱ्यांदा चौकशीसाठी डिनो मोरिया आणि त्याच्या भावाला बोलवण्यात आले आहे. हे दोघेही चौकशीसाठी दाखल झाले आहेत. सलग तिसऱ्या दिवशी त्याची चौकशी सुरु आहे.
डिनो मोरिया २६ मे २०२५ रोजी मुंबई पोलीस आयुक्तालयातील आर्थिक गुन्हे शाखेच्या कार्यालयात चौकशीसाठी हजर झाला होता. डिनोची तब्बल ८ तास चौकशी करण्यात आली. मिठी नदीतील साफसफाईच्या कथित घोटाळ्याशी संबंधित प्रकरणात डिनोला मुंबई पोलिसांनी चौकशीसाठी हजर राहण्याबाबत समन्स जारी केले होते. त्यानुसार सकाळी ११ वाजता डिनो आर्थिक गुन्हे शाखेच्या कार्यालयात हजर झाला. सायंकाळी ७:४० च्या सुमारास डिनो मुंबई पोलीस आयुक्तालयातून बाहेर पडला.
मिठी नदीतील गाळ काढण्यासाठी २००५ ते २०२१ पर्यंत हा प्रकल्प सुरू होता. यासाठी ११०० कोटी रुपयांचे कंत्राट देण्यात आले होते. एकूण १८ कंत्राटदारांना या काळात कंत्राट देण्यात आले. बृहन्मुंबई महानगरपालिकेने (बीएमसी) गाळ काढण्याच्या कंत्राट प्रकरणी यंत्रे आणि गाळ काढण्याची उपकरणे भाड्याने घेण्यामध्ये कथित आर्थिक अनियमितता झाल्याचा आरोप आहे. २०१७ ते २०२१ या वर्षांदरम्यान मिठी नदी गाळ काढण्यासाठी देण्यात आलेल्या कंत्राटामध्ये घोटाळा झाल्याचे पोलिसांच्या प्राथमिक तपासात निष्पन्न झाले. त्यानुसार आर्थिक गुन्हे शाखेच्या पोलिसांनी १३ जणांविरोधात गुन्हा दाखल केलेला आहे.
१३ जणांवर गुन्हा दाखल
डिनोने अटकपूर्व जामिनासाठी कोर्टात धाव घेतली आहे. तो त्यासाठी प्रयत्न करत असल्याची माहिती समोर आली आहे. डिनो हा आदित्य ठाकरेंचा निकटवर्तीय अशीही ओळख असल्याने या चौकशीला एक वेगळे वळण लागण्याची शक्यता आहे. या प्रकरणात १३ जणांवर गुन्हा दाखल करण्यात आला आहे. यामध्ये काही कंत्राटदार आणि काही अधिकारी देखील आहेत.
