बीड : प्रतिनिधी
बीड जिल्ह्यातील धारूर तालुक्यात मुलानेच जन्मदात्या आईचा जीव घेतल्याचा प्रकार समोर आला आहे. आईला लोखंडी पाईपने मारहाण केल्याने ती जखमी झाली. त्यानंतर तिला रुग्णालयात दाखल करण्यात आले होते. मात्र, उपचारादरम्यान आईने आपले प्राण सोडले. आपल्याच मुलाने लोखंडी पाईपने केलेला आघात आईला सहन न झाल्याने तिचा मृत्यू झाला. सुवर्णमाला बांगर असे मृत महिलेचे नाव असून दत्ता बांगर असे आरोपीचे नाव आहे. या प्रकरणी पोलिसांनी आरोपीविरुद्ध गुन्हा दाखल करून अटक केली. त्यानंतर न्यायालयाने आरोपीला १४ दिवसांची न्यायालयीन कोठडी सुनावली.
धारुर तालुक्यातील तरनळी गावात सुवर्णमाला आपल्या घरासमोर बसल्या होत्या. त्यावेळी त्यांचा मुलगा दत्ता बांगर याने घरात जाऊन लोखंडी पाईप आणत त्याच पाईपाने आईच्या डोक्यात मारहाण केली. यावेळी दत्ता याचा लहान मुलगादेखील समोर होता. त्यावेळी त्यांच्या बाजूला असलेल्या भावजाईलाही त्याने जीवे मारण्याची धमकी दिली. दरम्यान, लेकाकडून झालेल्या या मारहाणीत रक्तबंबाळ झालेल्या सुर्णमाला बांगर यांना पुढील उपचारासाठी अंबाजोगाई येथील स्वाराती रुग्णालयात दाखल करण्यात आले. मात्र, उपचारादरम्यान त्यांचा मृत्यू झाला.
या प्रकरणी दत्ता बांगर याच्या विरोधात गुन्हा दाखल करण्यात आला असून त्यास पोलिसांनी अटक केली आहे. या प्रकरणी आरोपी मुलाला न्यायालयात हजर केले असता न्यायालयाने १४ दिवसांची न्यायालयीन कोठडी सुनावली.
