ईडी कार्यालयाबाहेर आंदोलन
मुंबई : नॅशनल हेराल्ड आणि असोसिएटेड जर्नल्स लिमिटेडमधील मनी लाँड्रिंग प्रकरणात अंमलबजावणी संचालनालयाने (ईडी) सोनिया गांधी, राहुल गांधी, सॅम पित्रोदा, सुमन दुबे यांच्यावर आरोपपत्र दाखल केल्याच्या निषेधार्थ मुंबई काँग्रेसने ईडी कार्यालयाबाहेर केलेल्या आंदोलनावेळी पोलिसांसोबत झालेल्या झटापटीत काँग्रेस खासदार वर्षा गायकवाड जखमी झाल्या आहेत. त्यांना तातडीने जी. टी. रुग्णालयात दाखल करण्यात आले.
आम्ही शांततेत निदर्शने करीत असताना मुंबई पोलिसांनी माझ्यासह इतर कार्यकर्त्यांशी झटापट केली. सर्वांना अलोकतांत्रिक पद्धतीने ताब्यात घेण्यात आल्याचा आरोप खासदार वर्षा गायकवाड यांनी केला. लोकशाहीचे समर्थन करणारा आणि लोकांच्या हक्कांसाठी लढणारा काँग्रेस हा एकमेव पक्ष आहे. राहुल गांधी यांच्या लोकप्रियतेची भाजपला भीती वाटत आहे. त्यामुळे आमच्याविरुद्ध खोटे खटले दाखल करून धमकावण्याचा प्रयत्न केला जात असल्याचे त्यांनी म्हटले. सोशल मीडियावर पोस्ट करून वर्षा गायकवाड यांनी भाजपच्या दडपशाहीचा निषेध केला आहे.
