नवी दिल्ली : भारताचा भालाफेकपटू नीरज चोप्राच्या शिरपेचात मानाचा तुरा खोवला गेला आहे. कारण जी गोष्ट नीरज चोप्राला ऑलिम्पिकमध्ये करता आली नव्हती, ती त्याने आता करून दाखवली. नीरज चोप्राने डायमंड लीगमध्ये इतिहास रचला. त्याने त्याच्या कारकिर्दीत पहिल्यांदाच ९० मीटर भाला फेकल्याचे आता समोर आले आहे. दोहा डायमंड लीगमध्ये त्याने तिस-या प्रयत्नात ९०.२३ मीटर भाला फेकला.
नीरज चोप्राने पहिल्याच प्रयत्नात ८८.४४ मीटर भाला फेकला. त्यानंतर त्याच्याकडून आशा वाढल्या होत्या. पण दुस-या फेरीत त्याच्याकडून चूक झाली आणि फाऊलमुळे भारतीय चाहते निराश झाले. पण त्यानंतर त्याने ९०.२३ मीटर भाला फेकून नवा विक्रम नोंदविला. पॅरिस ऑलिंपिकमध्ये रौप्यपदक जिंकल्यानंतर नीरज पहिल्यांदाच मैदानात उतरला होता. यापूर्वी नीरजची सर्वोत्तम कामगिरी ८९.९४ मीटर होती. पण नीरजने आता आपलाच विक्रम मोडीत काढला.
नीरजने टोकियो ऑलिम्पिक २०२० मध्ये सुवर्णपदक जिंकले होते. जागतिक ऍथलेटिक्स चॅम्पियनशिपमध्येही त्याच्या नावावर सुवर्णपदक आहे. यानंतरही तो त्याच्या कारकिर्दीत ९० मीटर फेक करू शकला नाही. यापूर्वी त्याची सर्वोत्तम कामगिरी ८९.९४ मीटर होती. नीरजने २०२२ मध्ये स्टॉकहोममध्ये हा थ्रो केला होता. गेल्या वर्षी लॉसनेमध्येही तो ९० मीटरच्या जवळ पोहोचला होता. पण तो फक्त ८९.४९ पर्यंत पोहोचू शकला. आता नीरज चोप्रा ९० मीटर भाला फेकणारा तिसरा आशियाई खेळाडू ठरला. भालाफेक स्पर्धेत ९८.४८ मीटरच्या सर्वात लांब फेकीचा विक्रम जान झेलेझनी यांच्या नावावर आहे. नीरजच्या आधी आशियाई खेळाडूंमध्ये फक्त दोघांनीच ९० मीटरपेक्षा जास्त फेक केली आहे. पाकिस्तानच्या अर्शद नदीम व्यतिरिक्त तैवानच्या चेंग चाओ सननेही ही कामगिरी केली. आता निरजच्या नावावर हा विक्रम नोंदविला.
