२६ राफेल मरीन विमाने खरेदी करार

फ्रान्ससोबत ६३ हजार कोटींचा करार
नवी दिल्ली : वृत्तसंस्था
जम्मू-काश्मीरच्या पहलगाममध्ये झालेल्या दहशतवादी हल्ल्यानंतर भारत-पाकिस्तानमध्ये तणाव वाढला आहे. दोन्ही बाजूंनी लष्करी सराव सुरु झाला आहे. सैनिकी पातळीवर हालचालींना वेग आला आहे. त्यामुळे युद्धजन्य स्थिती निर्माण झालेली असतानाच भारताने फ्रान्ससोबत मोठा करार केला. तब्बल २६ राफेल मरीन विमाने खरेदी करण्यासाठी २ देशांत करार झाला. हा करार ६३ हजार कोटी रुपयांचा आहे.
या करारानुसार भारतीय नौदल फ्रान्सकडून २६ लढाऊ विमाने खरेदी करणार आहे. या करारावेळी भारताचे प्रतिनिधीत्व संरक्षण सचिव राजेशकुमार सिंह यांनी केले. यावेळी नौसेनेचे उपप्रमुख व्हाईस अ‍ॅडमिरल के. स्वामीनाथनदेखील उपस्थित होते. भारताला फ्रान्सकडून २२ सिंगल-सीट आणि ४ ट्विन-सीट विमाने मिळतील. या कराराचा मोठा फटका पाकिस्तानला बसेल. कारण भारतीय नौदल नवी विमाने आयएनएस विक्रांतवर तैनात करणार आहे. १९७१ च्या युद्धात भारतीय नौदलाने पाकिस्तानची दाणादाण उडविली होती. आता नव्या विमानांमुळे नौदलाची ताकद आणखी वाढणार आहे.
नवी विमाने ठरणार गेमचेंजर
फ्रान्सच्या डसॉल्ट एव्हिएशनकडून तयार केल्या जाणा-या राफेल-एम विमानांचा वापर विविध प्रकारच्या कारवायांसाठी केला जाऊ शकतो. ही विमाने नौदलासाठी गेमचेंजर ठरू शकतात. या करारामुळे भारताची सागरी सुरक्षा आणखी मजबूत होणार आहे. २०२९ पासून भारताला विमाने मिळण्यास सुरुवात होणार असून २०३१ पर्यंत ही प्रक्रिया पूर्ण झालेली असेल.