नवी दिल्ली : वृत्तसंस्था
शिवसेना पक्ष व चिन्ह शिंदे गटास देण्याच्या निर्णयावरील आव्हान याचिकेवर १४ जुलै रोजी सुप्रीम कोर्टात सुनावणी झाली. न्यायमूर्ती सूर्यकांत आणि न्यायमूर्ती जोयमल्या बागची यांच्या खंडपीठासमोर ही सुनावणी झाली. यावेळी आपण मुख्य याचिकेवर निर्णय करू, तेच योग्य राहील, असे न्यायमूर्ती सूर्यकांत यांनी सांगितले. आपण ऑगस्टची तारीख ठरवू, तोपर्यंत तुम्ही निवडणुका आल्या तर निवडणूक लढा, असे न्यायमूर्ती सूर्यकांत यांनी सांगितले.
गेल्या दोन वर्षांपासून जी अनिश्चितता होती, त्यावर आज सुप्रीम कोर्टाने स्वत:हून ऑगस्टमध्ये तुम्हाला तारीख देऊ, असे सांगितल्याने सुप्रीम कोर्टातील आजच्या या निर्णयामुळे ठाकरे गटाचे प्रमुख उद्धव ठाकरे यांना तुर्तास दिलासा मिळाल्याचे बोलले जात आहे. ऑगस्टमध्ये शिवसेना नाव आणि चिन्हावर निकाल लागल्यास महाराष्ट्रातील राजकारणावर, विशेषत: आगामी महापालिका आणि जिल्हा परिषद निवडणुकांवर मोठा प्रभाव टाकू शकतो.
. शिवसेना पक्ष व चिन्ह शिंदे गटास देण्याच्या निर्णयावरील आव्हान याचिकेवर सोमवारी सुप्रीम कोर्टात सुनावणी झाली. यावेळी उद्धव ठाकरेंच्या मागणीला एकनाथ शिंदेंनी विरोध केला. शिंदे गटाकडून मुकूल रोहतगी आणि नीरज किशन कौल यांनी यु्क्तिवाद केला तर ठाकरे गटाकडून रोहित शर्मा आणि कपिल सिब्बल यांनी युक्तिवाद केला. न्यायमूर्ती सूर्यकांत यांनी या प्रकरणाची मुख्य सुनावणी सुरु करण्याचे सांगितल्यानंतर कपिल सिब्बल यांनी ऑगस्ट महिन्यातील तारखेची मागणी केली. न्यायमूर्तींनी माझे वेळापत्रक तपासून तुम्हाला सुनावणीची तारीख कळवतो. तोपर्यंत तुम्ही निवडणुका आल्या तर निवडणूक लढा, असे न्यायमूर्ती सूर्यकांत यांनी सांगितले.
